Ég veit að það eru ekki allir hrifnir af kavíar en ég fæ ekki nóg af honum, sérstaklega þegar hann er borinn fram með sýrðum rjóma og öðru góðgæti. Ég veit ekki hversu oft ég hef boðið upp á þetta snakk (það er klikkað!) og þessi pizza er með þeim betri sem hægt er að hugsa sér (og passar svo vel með kældu hvítvíni). 

Ég ákvað um helgina að bjóða heim í vöfflur yfir leiknum (Svíþjóð – England, sem útskýrir sænska fánann á borðinu). Ég bar vöfflurnar fram með sultum, nutella og rjóma en þar sem leikurinn var fljótlega eftir hádegi vildi ég líka bjóða upp á matarmeiri vöfflur. Ég átti kavíar í ísskápnum sem fékk að fara á vöfflurnar ásamt sýrðum rjóma, rauðlauki og dilli (eins og á pizzunni góðu). Það kom brjálæðislega vel út! Þetta er einfaldlega nokkuð sem allir þurfa að prófa, líka þeir sem þykjast ekki borða kavíar!

Besta vöffluuppskriftin kemur frá Food 52:

• 1½ bolli hveiti
• ½ bolli kornsterkja (maizenamjöl)
• 1 tsk lyftiduft
• ½ tsk matarsódi
• 1 tsk salt
• 2 bollar nýmjólk eða súrmjólk
• 2/3 bolli grænmetisolía (vegetable oil) eða brætt smjör
• 2 egg
• 3 tsk sykur
• 1 ½ tsk vanilludropar

Setjið hveiti, kornsterkju, lyftiduft, matarsóda og salt í skál og blandið vel saman. Bætið mjólk, grænmetisolíu, eggjum, sykur og vanillu saman við og blandið vel. Látið deigið standa í 30 mínútur. Bakið vöfflurnar á smurðu vöfflujárni.

Yfir vöfflurnar:

• sýrður rjómi (hrærið hann aðeins upp, svo hann verði kekkjalaus og mjúkur)
• kavíar
• rauðlaukur, fínhakkaður
• ferskt dill

Allt hráefni í þessa uppskrift fæst í

Það styttist óðum í lokahnykkinn á HM þar sem síðustu leikirnir eru núna um helgina. Það sem ég hlakka til! Mér þykir þó lítið varið í að horfa á leikina án góðra veitinga. Hér koma því tíu góðar tillögur að léttu snarli til að njóta yfir úrslitaleiknum:

1. Pizza með karamelluseruðum lauki og pipruðu beikoni er skotheldur hittari. Skerið pizzuna í sneiðar og berið fram með köldum bjór. Einn lesandi sagðist bæta döðlum á þessa pizzu og það er ég búin að vera á leiðinni að prófa. Mig grunar að það sé klikkað!

2. Tómatcrostini með þeyttum fetaosti er öruggt kort sem slær alltaf í gegn. Ég gæti lifað á þessu!

3. Fræhrökkbrauð með sítrónu- og fetamauki er hættulega gott kombó. Það er hægt að útbúa bæði hrökkbrauðið og fetamaukið deginum áður sem mér þykir alltaf vera kostur. Helsti ókosturinn fyrir mig er hins vegar að ég ræð ekki við mig með þetta fyrir framan mig og borða alltaf manna mest.

4. Brauðtertan hennar mömmu er orðin „klassiker“ þegar kemur að stórviðburðum og hún hefur boðið upp á hana yfir ófáum landsleikjum. Það er alltaf stemning þegar mamma mætir með brauðtertuna og það væri ekki hægt að taka saman þennan lista án þess að hafa hana með.

5. Nutelladip og ávextir er vinsælt snarl sem hverfur yfirleitt strax ofan í krakkana.

6. Krydduð pretzel- og hnetublanda passar stórvel með köldum bjór og fótboltaleik.

7. Tortillaskálar með grilluðum tígrisrækjum, avókadó og sýrðum rjóma og kælt hvítvín… þarf að segja eitthvað meira??

8. Pekanhjúpuð ostakúla hefur verið í uppáhaldi hjá mér síðan ég gerði hana fyrst og ég býð upp á hana við hvert tækifæri sem gefst. Mér þykir passa best að bera hana fram með Ritzkexi.

9. Beikonvafin pulsubrauð er réttur sem kemur skemmtilega á óvart. Stundum er það einfalda bara best. Þetta hverfur alltaf hratt af borðinu og vekur alltaf lukku.

10. Beikonvafið brauð með rjómaosti, döðlum og valhnetum er einfaldlega klikkgott og passar við öll tilefni

Öll hráefni í þessar uppskriftir fást í

Þessi fyrsta sumarfrísvika mín hefur boðið upp á æðislegt veður og þrátt fyrir að hafa lofað uppskrift af pizzastöngum hingað inn þá hef ég ekki getað setið inni við tölvuna þegar sólin loksins lét sjá sig.

Ég gerði pizzastangirnar fyrir úrslitaleik HM og fékk fjölmargar fyrirspurnir um uppskriftina eftir að ég setti mynd af þeim í Insta story. Ég gerði mér einfalt fyrir og keypti pizzadeigið tilbúið, þetta sem er upprúllað. Þá þurfti bara að rúlla því út, setja fyllinguna í og síðan notaði ég smjörpappírinn sem pizzadeigið kemur á, til að brjóta deigið saman. Þetta gekk allt mjög hratt fyrir sig og vakti mikla lukku yfir leiknum. Fullkomið föstudagssnarl!

Pizzastangir með pepperoni

• 1 rúlla pizzadeig
• 3-4 tsk ítölsk hvítlauksblanda
• 1/2 tsk red pepper flakes
• 6 msk rifinn parmesan
• 3 msk ólífuolía
• 1 bréf pepperoni (um 120 g)
• rúmlega 1/2 poki rifinn mozzarella (um 120 g)

Hitið ofninn í 200°.

Blandið ítalskri hvítlauksblöndu, red pepper flakes og rifnum parmesan saman í skál.

Rúllið deiginu út (eða fletjið það út í ferhyrning ef notað er heimagert) og stráið helmingnum af kryddblöndunni yfir deigið. Skerið pepperoni í fernt og dreifið yfir helminginn af deiginu. Brjótið helminginn sem er ekki með pepperoni yfir pepperoni-helminginn, þannig að fyllingin verði inn í. Skerið deigið í stangir og snúið hverri stöng í nokkra hringi. Penslið yfir brauðstangirnar með ólífuolíu og stráið kryddblöndu yfir. Færið brauðstangirnar yfir á bökunarplötu með bökunarpappír og snúið krydduðu hliðinni niður. Penslið með olíu og stráið kryddblöndu yfir (þannig að það er olía og krydd bæði undir og yfir brauðstöngunum) og bakið í 8-10 mínútur, eða þar til brauðstangirnar eru orðnar gylltar og fallegar.

Allt hráefni í þessa uppskrift fæst í

Á morgun byrja ég aftur að vinna eftir þriggja vikna sumarfrí. Ég á enn smá frí eftir sem ég ætla að eiga í vetur. Það bíður Londonferð í haust og útskrift sem þarf að undirbúa þannig að það verður gott að eiga frí inni. Ég ætlaði ekki að vera svona ódugleg hér á blogginu í fríinu en það gafst satt að segja ekki færi á að blogga þar sem ég fór bæði til Stokkhólms og stóð í framkvæmdum hér heima, sem tóku aðeins meiri tíma en ég gerði ráð fyrir. Núna er þó allt klárt og ég er svo þakklát fyrir það. Vil helst bara vera hér heima að dunda mér og fór varla út úr húsi alla helgina.

Ég borða nánast alltaf það sama í vinnunni, bollasúpu og hrökkbrauð með hummus. Ég fæ ekki leið á því en samt, hversu óspennandi?!? Inn á milli tek ég mig þó til og elda eitthvað hollara og betra, sem ég síðan frysti í nestisboxum þannig að ég geti gripið box með mér á morgnana. Þar sem grænmetisréttir vekja yfirleitt litla lukku hjá unglingunum mínum þá verða þeir oftast fyrir valinu í nestisboxin mín. Þennan rétt fann ég í gömlu Jamie Oliver-blaði og eldaði í gær. Það sem þó gerðist var að báðum stráknum mínum fannst rétturinn svo góður að þeir fengu sér sitthvora fulla skálina í morgunmat (vöknuðu vel eftir hádegi, þegar ég var búin að elda). Það er kannski von með þá og grænmetisrétti eftir allt! Það var nóg til og eftir að þeir voru búnir að borða fyllti ég 8 nestisbox sem bíða mín nú í frystinum.

Sætkartöflu, kjúklingabauna og spínatkarrý – uppskrift fyrir 6  (lítillega breytt uppskrift frá Jamie Oliver)

• 2 msk ólífuolía
• 2 rauðlaukar, sneiddir
• 3 msk karrýpaste (athugið að þau eru missterk, ég var með frá Blue Dragon)
• 1 rautt chili, fínhakkað (takið fræin úr ef þið viljið ekki hafa réttinn sterkan)
• 3 cm bútur af engifer, rifinn
• handfylli af kóriander, laufin týnd af og stöngullinn hakkaður
• 3 sætar kartöflur, skornar í 2 cm bita
• 1 dós kjúklingabaunir (400 g), skolaðar
• 1 dós hakkaðir tómatar (400 g)
• 1 kjúklingateningur (eða grænmetisteningur)
• 2 tsk fiskisósa
• 1 dós létt kókosmjólk (400 g)
• 400 g spínat (ég var með 200 g), skolað

Hitið ólífuolíu í stórum potti eða pönnu yfir miðlungsháum hita. Bætið rauðlauk og karrý saman við og steikið í 10 mínútur, þar til laukurinn er orðin mjúkur. Bætið chilí, engifer, kórianderstönglum, sætum kartöflum og kjúklingabaunum í pottinn og steikið í 5 mínútur. Bætið þá tómötum, kjúklingateningi og 2 dl af vatni út í og látið suðuna koma upp. Lækkið hitan og látið sjóða við vægan hita í 10-15 mínútur undir loki. Takið lokið af og sjóðið áfram í 15-20 mínútur, þar til kartöflurnar eru soðnar og sósan hefur þykknað. Hærið kókosmjólkinni og fiskisósunni út í og sjóðið áfram í nokkrar mínútur. Hrærið spínatinu út í og sjóðið í 2-3 mínútur. Stráið kórianderlaufunum yfir og berið fram með hrísgrjónum.

Ef þið ætlið að frysta réttinn þá er best að láta hann kólna í pönnunni áður en hann er settur í box og frystur. Rétturinn geymist í 3 mánuði í frysti.

Allt hráefni í þessa uppskrift fæst í

Malín og Oliver hafa upp á síðkastið beðið um að fá að sjá um kvöldmatinn stöku kvöld hér heima og það er heldur betur auðsótt hjá þeim. Mér þykir algjör lúxus að fá hvíld frá eldhúsinu inn á milli og sérstaklega í hversdagsamstrinu, þegar ég er að koma seint heim og það bíða jafnvel mörg verkefni um kvöldið.

Um daginn var eitt af þeim kvöldum sem þau sáu um matinn og hann varð svo æðislega góður að ég má til með að deila uppskriftinni… eða réttara sagt hugmyndinni. Það er nefnilega alveg frábært að skipta hamborgarabrauði út fyrir sæta kartöflu, eins og þau gerðu. Þau skáru sætu kartöflurnar í þykkar sneiðar, pensluðu þær með olíu og krydduðu með maldonsalti, svörtum pipar og chili explosion. Kartöflurnar voru síðan bakaðar við 180° þar til mjúkar í gegn. Hamborgararnir voru síðan steiktir (líka gott að grillla þá!) og svo voru herlegheitin borin fram með hefðbundu meðlæti. Klikkgott!

Allt hráefni í þessa uppskrift fæst í

Í næstu viku hefst haustrútínan hér á heimilinu en þá byrja skólarnir og sumarfríi strákanna tekur enda. Ég hef alltaf elskað haustin og finnst svo mikil stemning fylgja því þegar allt hefst á nýjan leik eftir sumarið. Ég finn að okkur er farið að langa í haustlegri mat og nú hef ég gert þessar góðu kjötbollur tvisvar á mjög stuttum tíma.

Það eiga eflaust margir uppskriftina af þessum bollum enda uppskrift sem gekk manna á milli fyrir mörgum árum. Bollurnar voru oft gerðar litlar og hafðar sem pinnamatur en mér þykir gott að gera þær aðeins stærri og bera fram með kartöflumús, sósu og sultu. Ég hrúga bara öllum hráefnunum í hrærivélina og vinn þau snögglega saman. Síðan tek ég ískúluskeið (heitir það ekki annars það?) og þá fæ ég allar kjötbollurnar jafn stórar á stuttum tíma. Í gærkvöldi átti ég bara einn bakka af nautahakki og hálfan pakka af kexinu en setti samt allt bréfið af púrrulaukssúpunni og tvö egg og kjötbollurnar urðu mjög góðar. Þetta virðist bara aldrei klikka!

Kjötbollur með púrrlaukssúpu og rizkexi

• 1 kg nautahakk (eða 500 g nautahakk og 500 g svínahakk)
• 2 egg
• 1 bréf púrrulaukssúpa
• 1 pakki rizkex (fínmulið)

Hrærið allt saman og mótið kjötbollur. Bakið við 180° í 15 mínútur.

Allt hráefni í þessa uppskrift fæst í

Skólarnir hefjast á morgun og þar með þykir mér haustið formlega komið. Ég fæ fiðring í magann við tilhugsunina. Þessi árstími hefur alltaf verið í uppáhaldi hjá mér. Í ár eru ákveðin kaflaskipti hjá okkur því núna eru öll börnin mín komin í menntaskóla. Það sem tíminn líður hratt! Fyrir nokkrum árum gerði ég stóra uppskrift súkkulaðibitakökum og degið fékk að dúsa í ísskápnum fyrstu skólavikuna. Á hverju kvöldi bakaði ég nokkrar kökur sem við fengum okkur svo nýbakaðar með kvöldkaffinu. Kannski ekki það hollasta en súpernotaleg byrjun á haustinu.

Vikumatseðill

Mánudagur: Smjörsteiktur þorskur

Þriðjudagur: Tælensk núðlusúpa

Miðvikudagur: Hakkabuff með karamelluseruðum lauki og rjómasósu

Fimmtudagur: Grænmetisbaka með piparosti

Föstudagur: Kjúklingur í satay með fetaosti og spínati

Með helgarkaffinu: Heimsins bestu súkkulaðibitakökur

Öll hráefni í þessar uppskriftir fást í

Ef það er einhver uppskriftaflokkur hér á síðunni sem mig langar að stækka þá eru það fiskréttirnir. Krakkarnir mínir elska fisk og ég líka, samt er ég ódugleg við að prófa nýjar uppskriftir af fiskréttum.

Í gærkvöldi prófaði ég þó nýjan fiskrétt sem vakti svo mikla lukku hjá krökkunum að allir fengu sér ábót og Malín sagði hann vera einn sá besti fiskréttur sem hún hafði smakkað!  Sjálf hrósaði ég matnum við hvern bita því mér fannst hann svo góður. Með fiskinum bar ég fram nýjar soðnar kartöflur og Hvítlauks- og steinseljusósuna frá Fisherman. Þvílík veisla!

Fiskur í karrý með tómötum og eggjum – uppskrift fyrir 5-6

• um 800 g þorskur
• 6-8 msk smjör
• um 1 msk karrý
• sítrónupipar
• salt
• 4 egg
• 2 stórir tómatar

Skerið fiskinn í bita og steikið í smjöri. Kryddið með karrý, sítrónupipar og salti.

Harðsjóðið eggin. Hakkið eggin og tómatar og setjið yfir fiskinn á pönnunni.

Allt hráefni í þessa uppskrift fæst í

Það fór lítið fyrir grillkvöldunum hjá mér þetta sumarið og í raun var grillið skammarlega lítið notað. Það fær þó að standa frammi eitthvað áfram, enda svo sem engin ástæða til að ganga frá því strax. Ég er vön að rúlla grillinu inn í skúr þegar haustlægðirnar byrja að ganga yfir því ég er svo hrædd um að það fari á flakk annars. Veit ekki hversu oft ég hef hlupið út á pall á náttsloppnum til að koma grillinu í skjól á haustnóttum. Ég vona að mér takist að koma í veg fyrir slík ævintýri í ár.

Ein vinkona mín sagði mér frá svo góðum hamborgurum sem þau hjónin gera sér stundum og ég mátti til með að prófa þá. Ég veit að þau eru snjöll í eldhúsinu og hef nú þegar birt aðra æðislega uppskrift frá þeim hér á blogginu, sem ég mæli svo sannarlega með. Þegar þau eru búin að grilla hamborgara á annari hliðinni þá snúa þau honum við og raða piparosti og mexíkóosti yfir (skera þá í þunnar sneiðar og leggja þá hlið við hlið yfir borgarann), setja svo rifsberjahlaup yfir ostana og ost (t.d. Gouda) yfir rifsberjahlaupið. Þau loka svo grillinu og leyfa þessu að bráðna yfir hamborgarann. Hamborgarinn er svo borinn fram með hefðbundu meðlæti og það er sérlega gott að setja líka sterkt sinnep á borgarann. Klikkaðslega gott!

Allt hráefni í þessa uppskrift fæst í

Fyrir mörgum árum kom Jakob þeirri hefð á að það væri súpa í matinn einu sinni í viku. Sú hefð hélt í fleiri ár og ég held að allir hafi verið ánægðir með það fyrirkomulag. Mér þykja súpur svo góðar og sérlega notalegur matur þegar fer að kólna úti. Með súpunum vil ég helst hafa heimabakað brauð og gott smjör (þeytt smjör er í uppáhaldi).

Ég setti á sínum tíma hingað inn uppskrift af blómkálssúpu sem ég fékk hjá vinkonu minni. Í þeirri uppskrift er meðal annars sveppasmurostur en ég prófaði um daginn að skipta honum út fyrir camembertsmurost og breytti aðeins hlutföllunum í leiðinni. Súpan varð æðisleg! Ég bar hana fram með nýbökuðu Gló-brauði og við ætluðum ekki að geta hætt að borða. Dásamleg máltíð á haustkvöldi.

Blómkálssúpa með camembertsmurosti og sweet chili (uppskrift fyrir 5)

• 10 dl vatn
• 2  kjúklingateningar
• 1 dós camembertsmurostur
• um 700 g blómkál
• 1-2 msk sweet chili sósa
• nokkrir dropar hunang
• ½ – 1 tsk balsamik edik
• salt og pipar

Hitið saman vatn og kjúklingateninga í rúmgóðum potti. Skolið blómkálið og brytjið það niður. Hrærið smurostinum saman við soðið. Bætið blómkálinu út í og sjóðið þar til það er orðið meyrt. Bætið sweet chili sósu , hunangi og balsamik ediki út í og hrærið. Smakkið til með salti og pipar.

Allt hráefni í þessa uppskrift fæst í

Mér finnst ég hafa hrúgað ansi mörgum uppskriftum af bananakökum hingað inn og held nú áfram að bera í barmafullan lækinn. Það er bara ekki hægt að eiga of margar uppskriftir af bananakökum. Þær geymast vel en klárast þó alltaf strax. Ég baka því oftast tvær í einu því ég veit að fyrri kakan klárast samdægurs. Þessi uppskrift kemur frá Smitten Kitchen og er jafn dásamleg og allt sem kemur þaðan.

Marmara-bananakaka

• 3 stórir þroskaðir bananar
• 1/2 bolli (115 g) smjör, brætt
• 3/4 bolli (145 g) ljós púðursykur
• 1 stórt egg
• 1 tsk vanilludropar
• 1 tsk matarsódi
• 1/4 tsk salt
• 1 bolli (130 g) plús 1/4 bolli (35 g) hveiti
• 1/2 tsk kanill
• 1/4 bolli (20 g) kakó
• 3/4 bolli (130 g) súkkulaðidropar (eða hakkað súkkulaði)

Hitið ofn í 180° og smyrjið formkökuform.

Bræðið smjörið og stappið bananana saman við það. Hrærið púðursykri, eggi, vanilludropum, matarsóda og salti saman við. Bætið 1 bolla (130 g) af hveiti saman við og hrærið snögglega saman við deigið.

Setjið helminginn af deiginu í aðra skál (þarf ekki að vera nákvæmt mál en helmingurinn af deiginu er um 365 g, veltur þó á stærðinni á bönununum). Hrærið því sem eftir var af hveitinu  ásamt kanilnum saman við annan helming deigsins. Hrærið kakó og súkkulaðibitum saman við hinn helming deigsins.

Setjið stórar doppur af deigunum í botninn á forminu (það getur verið gott að miða við að setja einn lit í miðjuna á forminu og hinn sitt hvoru megin við). Setjið næsta lag af deigi þannig að ljóst deig fari yfir dökkt deig og öfugt. Endurtakið þar til allt deigið er komið í formið. Notið smjörhníf eða spaða til að blanda deiginu örlítið saman (það getur verið gott að miða við að gera áttur með hnífnum á tveim til þrem stöðum – passið að gera ekki of mikið!).

Bakið kökuna í 55-65 mínútur eða þar til prjónn sem hefur verið stungið í kökuna kemur hreinn upp (það má þó gera ráð fyrir að það komi brætt súkkulaði á hann). Látið kökuna standa í forminu í smá stund áður en hún er tekin úr því.

Allt hráefni í þessa uppskrift fæst í 

Ég, mamma og Malín skelltum okkur til London yfir helgina og eyddum þar langri helgi saman með bróður mínum sem flutti þangað í vor. Ferðin var æðisleg, veðrið gott og yndislegt að fá smá frí saman.

Við flugum til London snemma á fimmtudagsmorgninum og ég var svo þreytt að það náði engri átt. Mamma var þó fersk og til í fjörið sem var framundan.

Eyþór bróðir vinnur í Seðlabankanum og við fengum að heimasækja hann og skoða bankann. Skoðunarferðin endaði á hádegismat í mötuneyti bankans (frábært úrval og góður matur) og rúnt um fjármálahverfið, með viðkomu á helstu börum á svæðinu sem voru allir þéttsetnir. Svo gaman að sjá! Það voru strangar reglur varðandi heimsókn okkar í bankann og bannað að taka myndir þar. Þessi mynd var tekin af okkur mæðgunum á einum af börunum við bankann.

Við gengum hátt í 15 km á dag, kíktum í búðir og fengum okkur hressingu inn á milli. Við vorum dauðar þegar við komum upp á hótel á kvöldin og ég var svo fegin að hafa tekið mér frídag í gær og geta sofið út.

Það sem þessar tvær eru mér dýrmætar! Yndislegir dagar að baki sem gáfu ómetanlega inneign í minningabankann.

Það styttist í helgina og eflaust einhverjir farnir að huga að helgarmatnum. Pizzur eru fastur liður á föstudagskvöldum hjá mörgum og hér heima tökum við tarnir í pizzubakstri. Þá höfum við pizzu um hverja helgi og prófum nýtt álegg sem oftast. Þessa samsetningu sá ég hjá The Pioneer Woman og okkur fannst hún meiriháttar góð – eins og allt sem kemur frá henni!

Pizza með fíkjusultu, hráskinku, ruccola og parmesan

• pizzabotn (keyptur eða heimabakaður, uppskrift hér)
• 1/2 bolli fíkjusulta
• maldonsalt
• um 350 g ferskur mozzarella, skorinn í þunnar sneiðar
• um 225 g hráskinka
• um 350 g ruccola
• parmesan

Hitið ofn í 250° og setjið ofnplötu í neðstu grind.

Fletjið pizzadegið út og smyrjið fíkjusultunni yfir. Stráið smá maldonsalti yfir sultuna. Leggið mozzarellasneiðar yfir og bakið pizzuna í 12-15 mínútur, eða þar til botninn er orðinn stökkur og osturinn bráðnaður. Setjið hráskinkuna strax yfir heita pizzuna og leggið síðan vel af ruccola yfir hráskinkuna. Endið á að strá parmesanosti yfir.

Allt hráefni í þessa uppskrift fæst í

Hér heima eyddum við allri síðustu viku í flensu, þar sem fjölskyldumeðlimir leystu hvort annað af í veikindunum. Ég tók síðust við keflinu og hef legið síðan ég kom heim úr vinnunni á föstudaginn. Nú vona ég að við náum þessu úr okkur í dag og að allir fari frískir inn í nýja viku.

Ég leitaði í gamlar uppskriftir fyrir matseðil vikunnar og fann ýmislegt sem ég var búin að gleyma. Ég man að pastarétturinn var mjög vinsæll hér heima á tímabili og það verður gaman að sjá hvort hann veki enn sömu lukku. Milljón dollara spaghettíið hefur alltaf verið vinsæl uppskrift á blogginu og virðist falla í kramið hjá öllum aldurshópum. Að lokum þá er himneska hnetusmjörskakan uppskrift sem má ekki gleymast, hún er allt of góð til þess!

Vikumatseðill

Mánudagur: Steiktur fiskur í kókoskarrý

Þriðjudagur: Pasta með púrrulauk og beikoni

Miðvikudagur: Milljón dollara spaghetti

Fimmtudagur: Kjúklingagratín með tómat- og ostasósu

Föstudagur: Pizzuídýfa

Með helgarkaffinu: Himnesk hnetusmjörskaka

Öll hráefni í þessar uppskriftir fást í

Þegar við Gunnar vorum í Stokkhólmi í sumar rifum við okkur upp á hverjum morgni til að ná morgunverðinum á hótelinu. Það þarf mikið til að hann rífi sig upp á morgnana, hvað þá í miðju sumarfríi, en morgunmaturinn á Haymarket er bara svo góður að það er ekki hægt að sofa hann frá sér. Gunnar endaði alltaf morgunmatinn á að fá sér sænskar pönnukökur og síðasta morguninn lofaði ég að gera sænskar pönnukökur þegar við kæmum heim.

Ég hef enn ekki staðið við að baka hefðbundnar sænskar pönnukökur (uppskrift af þeim er hér) en ég gerði þó aðra tegund af sænskri pönnuköku í kvöldmat um daginn, fyllta ofnskúffupönnuköku. Svíar gera oft pönnuköku í ofnskúffu og setja þá jafnvel beikon í hana, en hér er fyllingu smurt yfir pönnukökuna og henni svo rúllað upp. Svo gott!

Pönnukökurúlla með skinku- og ostafyllingu (uppskrift fyrir 6)

Deig:

• 125 g smjör
• 2,5 dl hveiti
• 3 dl mjólk
• 4 egg

Fylling:

• 3 msk smjör
• 4 msk hveiti
• 3 dl mjólk
• 1,5 dl rjómi
• 3 msk fínhökkuð basilika
• 100 g skinka, skorin í bita
• 1 dl rifinn ostur
• 150 g kokteiltómatar
• 1 tsk salt
• smá svartur pipar

Yfir:

• 1,5 dl rifinn ostur

Hitið ofn í 200°. Bræðið smjör í potti. Hrærið hveiti og mjólk saman við smjörið og hitið þar til deigið losnar frá könntum pottarins (hrærið reglulega í pottinum). Takið pottinn af hitanum og hrærið einu eggi í einu saman við deigið með handþeytara. Setjið deigið í ofnskúffu sem hefur verið klædd með bökunarpappír og bakið í neðri hluta ofnsins í um 20 mínútur. Þegar pönnukakan er tilbúin er best að hvolfa henni á nýjan bökunarpappír og taka bökunarpappírinn sem pönnukakan bakaðist á af. Látið pönnukökuna kólna.

Fylling: Bræðið smjörið í potti. Hrærið hveiti saman við. Bætið mjólk smátt og smátt saman við og hrærið stöðugt í pottinum á meðan. Bætið rjóma í pottinn og látið sjóða við vægan hita í um 5 mínútur. Bætið basiliku, skinku og osti í pottinn. Skerið tómatana í tvennt og hrærið þeim saman við fyllinguna. Smakkið til með salti og pipar.

Dreifið fyllingunni yfir pönnukökuna og rúllið henni upp frá langhliðinni. Setjið pönnukökuna á bökunarpappír með sárið niður. Stráið rifnum osti yfir og bakið í 10 mínútur. Berið pönnukökuna fram heita.

Allt hráefni í þessa uppskrift fæst í

Ég hef varla verið heima undanfarnar vikur og hef því lítið náð að dunda mér í eldhúsinu. Það styttist þó í að það fari að róast hjá mér og þegar það gerist verður vonandi meira líf hér á blogginu því ég með langan lista af uppskriftum sem mig langar að prófa.

Þangað til nýt ég góðs af uppskriftum sem eiga eftir að fara hingað inn, eins og þessi súkkulaðimús. Þeir sem lesa hér reglulega vita eflaust að súkkulaðimús er sá eftirréttur sem ég geri hvað oftast því börnin mín vita fátt betra. Um daginn breytti ég út af vananum og bætti After Eight í súkkulaðimúsina. Útkoman var æðisleg!

After Eight súkkulaðimús ( uppskrift fyrir 6)

• 100 g suðusúkkulaði
• 15 plötur After Eight
• 3 eggjarauður
• 5 dl rjómi

Bræðið súkkulaðið í örbylgjuofni eða yfir vatnsbaði. Látið það kólna aðeins áður en eggjarauðum er hrært saman við. Hrærið þar til blandan er orðin slétt (ef hún verður kekkjótt eða of þykk er smá rjóma hrært saman við).

Þeytið rjómann en alls ekki of stífann. Hrærið léttþeyttum rjómanum saman við súkkulaðiblönduna í smáum skömmtum með sleikju. Hrærið blöndunni varlega saman þar til hún hefur blandast vel.

Setjið súkkulaðimúsina í skálar og látið standa í ísskáp þar til hún hefur stífnað. Berið fram með berjum og jafnvel þeyttum rjóma.

Allt hráefni í þessa uppskrift fæst í

Það varð lengri þögn hér á blogginu en stóð til en undanfarnar vikur hef ég verið að vinna í verkefni sem hefur tekið svo mikinn tíma að ég hef ekki átt lausa stund til að sinna neinu.  Ég man ekki hvenær ég eldaði kvöldmat síðast og matarinnkaupin hafa snúist um að finna eitthvað sem krakkarnir geta eldað sjálf. Nú sér þó fyrir endan á þessari vinnutörn og ég held (og vona!) að það taki því allir fagnandi hér heima.

Ég man ekki eftir að hafa sagt frá því hér á blogginu að ég eldaði nokkra Hraðrétti fyrir Matur á mbl.is í vor. Núna síðast var birt tælensk núðlusúpa sem ég gerði og bara verð að benda á. Eins og sést á myndbandinu þá er súpan bæði einföld og fljótleg en hún er líka alveg meiriháttar góð og passar vel í haustveðrinu. Ég mæli með að prófa!

Þar sem ég hef ekki verið heima undanfarnar helgar hlakka ég sérlega mikið til helgarinnar. Ég er ekki með nein önnur plön en að slappa af og borða góðan mat. Í kvöld ætla ég að kíkja í matreiðslubækur og athuga hvort ég finni ekki einhverjar spennandi uppskriftir til að prófa. Mér heyrist á krökkunum að þeim langi í mexíkóska kjúklingasúpu og það er alltaf auðvelt að tala mig inn á hana. Hún klikkar aldrei!

Mexíkóskur matur er alltaf vinsæll hér heima og undir lok sumars eldaði ég svo gott tacos sem ég átti alltaf eftir að setja hingað inn. Uppskriftina fann ég á Gimme Delicious en þar má finna margt girnilegt.

Bragðmikið kjúklinga- og avókadó tacos (uppskrift fyrir 4)

• 450 g kjúkingabringur, skornar í munnbita
• 2 msk ólífuolía
• 2 hvítlauksrif, pressuð
• 1 msk chillikrydd
• 1/2 tsk cumin
• 1/4 tsk lauk- eða hvítlaukskrydd
• 1/4 tsk salt
• ferskur limesafi

Skerið kjúklingabringurnar í bita. Blandið saman ólífuolíu, pressuðum hvítlauksrifum, chillikryddi, cumin, laukkryddi og salti. Bætið kjúklingnum í blönduna og hrærið vel saman. Setjið í lokað ílát og látið standa í ísskáp í smá stund (má geyma í allt að 48 klst.). Hitið pönnu og steikið kjúklinginn þar til hann er fulleldaður, 8-12 mínútur. Takið af hitanum og setjið smá limesafa yfir.

Kóriandersósa

• 1/2 bolli sýrður rjómi eða grísk jógúrt
• 1/4 bolli ferskt kóriander
• 1 hvítlauksrif
• 1 tsk limesafi
• salt og pipar

Setjið öll hráefnin í matvinnsluvél eða blandara og vinnið saman í 30 sek.

Samsetning

• 2-4 avókadó (fer eftir stærð), skorið í sneiðar
• 6-8 litlar tortillur

Hitið tortillurnar á pönnu. Setjið kjúklinginn á heita tortilluna, setjið avókadó yfir og endið á kóriandersósu.

Allt hráefni í þessa uppskrift fæst í

Eins og svo oft áður byrja ég sunnudaginn með kaffibollann við tölvuna og plana vikuna. Mér þykir svo gott að fara inn í vikuna með fullan ísskáp og gott yfirlit yfir það sem er og þarf að gerast í vikunni.  Það er skemmtileg vika framundan með bíóferð og vinkonuhittingi. Ef ég nenni ætla ég síðan að mála svefnherbergið mitt um næstu helgi. Það hefur staðið til að taka það í gegn og nú ætla ég að láta verða af því. Í gær fór ég að skoða rúm og í dag ætla ég að velja málningu á veggina og ákveða hvernig ég ætla að hafa þetta. En fyrst af öllu, hér kemur vikumatseðill!

Vikumatseðill

Mánudagur: Fiskur í sweet chillí

Þriðjudagur: Hakk í pulsubrauði

Miðvikudagur: Minestrone og mozzarellafylltar brauðbollur

Fimmtudagur: Spaghetti Carbonara

Föstudagur: Kjúklingaborgari

Með helgarkaffinu: Banana- og súkkulaðikaka

Öll hráefni í þessar uppskriftir fást í

Þegar það liggur grænmeti á síðasta snúningi í ísskápnum, eða afgangar af ostum, þá þykir mér gott að nýta það í pastarétt. Það virðist sama hvaða grænmeti og ostar eru notaðir, útkoman verður alltaf góð. Pastaréttir eru því fullkomnir í ísskápstiltektum. Þessi varð svo góður að ég flýtti mér að skrifa niður það sem fór í hann til að geta endurtekið leikinn.

Mexíkóostapasta með skinku, papriku og chili – uppskrift fyrir 6

• 2 skarlottulaukar, saxaðir smátt
• 2 hvítlauksrif, söxuð smátt
• 1 chili, fræhreinsað og saxað smátt
• skinka (ég var með hálft skinkubréf), skorin í bita
• 1 ½  rauð paprika, skorin í bita
• 1/2 box sveppir, sneiddir
• 1 ½ mexíkóostur
• 1 matreiðslurjómi (5 dl)
• pasta (ég var með 1 poka, 500 g.)

Hitið olíu á pönnu við miðlungsháan hita og mýkið skarlottulauk, hvítlauk og chili í nokkrar mínútur. Hækkið hitann og bætið skinku, papriku og sveppum á pönnuna. Steikið saman í nokkrar mínútur og bætið þá matreiðslurjóma og mexíkóosti (gott að skera hann í litla teninga áður svo hann bráðni hraðar) á pönnuna og látið sjóða saman þar til osturinn hefur bráðnað. Smakkið til með salti.

Sjóðið pasta eftir leiðbeiningum á pakkningu og blandið saman við sósuna. Það getur verið gott að setja smá af pastavatninu í pastasósuna til að þynna hana.

Allt hráefni í þessa uppskrift fæst í